Избранный от архиерейского служения на подвиги во славу Христа Бога нашего, молитвою и благочестием Того прославил еси; исповедничеством и житием святым преукрашенный, священномучениче Никито, первый епископе Орехово-Зуевский, предстоятелю собора новомучеников и исповедников Орехово-Зуевских, но яко имеяй дерзновение ко Владыце всех Богу от всяких нас бед свободи, со благоговением тебе зовущия:

Радуйся, священномучениче Никито, молитвенниче о душах наших!

Ангелов Творче и всея твари Содетель яви тя, священномучениче отче наш Никито, в годину лютых гонений, обышедших Церковь нашу, веры Православныя непорочнаго блюстителя и заповедей Христовых исполнителя, пастыря добраго и богомудраго, угодника Своего, многими добродетельми и подвигами преукрашеннаго. Сего ради венцем мученическим увенча тя Господь. Мы же, величающе тя, Святителю Христов , зовем ти сице:

Радуйся, града нашего и всея Московския земли похвало и утверждение;

Радуйся, заступниче наш милостивый, от Бога дарованный.

Радуйся, за труды и подвиги твоя упокоение вечное стяжавый;

Радуйся, предстателю наш пред Богом теплый.

Радуйся, временных и вечных благ от Бога нам присно испросителю;

Радуйся, вечного спасения нам ходатаю.

Радуйся, кающихся пред Богом споручниче;

Радуйся, в добрых делех наших наставниче.

Радуйся, рабе Божий благий и верный;

Радуйся, воине Христов непобедимый.

Радуйся, священномучениче Никито, молитвенниче о душах наших!

Видя Христос благое сердца твоего изволение и рачение, яко от юности твоея немолчно прославлял еси имя Его чтением и пением псалмов и песней духовных во святем храме Господнем во граде Покрове, в скинии небесней вчини тя, отче наш Никито, в лике мученик совершенных, возносиши Ему с ними вкупе ангельское пение: «Аллилуия».

Разумом свыше просвещаемь, святе Никито, возлюбил еси добродетельное житие, богобоязненному родителю твоему внимая, во страсе Божием и благочестии возрастал еси, к молитве и чтению книг священных навыкл еси, прилежне моляся и во трудех твоих образ будущего твоего добродетельного жития показал еси. Мы же, дивящеся таковому от юности твоея избранию, вопием ти сице:

Радуйся, доброго корене отрасле пречестная;

Радуйся, богобоязненных родителей чадо благословенное.

Радуйся, Божественное писание возлюбивший;

Радуйся, благочестие в себе воспитавший.

Радуйся, богобоязненному родителю твоему внимавший;

Радуйся, им в добродетелях веры и любви наставленный.

Радуйся, молитве наученный и в ней преуспевший;

Радуйся, добродетельное житие показавый.

Радуйся, книжную премудрость от юности усвоивый;

Радуйся, крине взращенный от земли к селениям райским.

Радуйся, священномучениче Никито молитвиниче о душах наших!

Силою озаряемь свыше, трудился еси, святый угодниче Божий, Никито, во граде Владимире, Премудрости Божией усердно поучался еси, и саном священным почтен был еси, пастырское служение со премудростию проходил еси и чад духовных во многих градех и весех собрал еси, Богу со благодарением поя: «Аллилуия»

Учение Премудрости не оставляя, прилежа со усердием ко оному, возрастал еси во благочестии и чистоте, и премудрости достигл еси; чудныя деяния святых пророк в Завете Ветсем описал еси; и пения церковнаго был еси чиноначальник. Сего ради, прославляя тя, сице зовем:

Радуйся, ключ мудрости взыскавый;

Радуйся, светильниче благочестия и знания.

Радуйся, учителей и в учении сущих споспешниче;

Радуйся, богослове и риторе славный и мудрый.

Радуйся, деяния пророков древних в книзе своей описавый;

Радуйся, за сие дело от многих похвалы стяжавый.

Радуйся, пастырских добродетелей сияние;

Радуйся, за труды твоя и подвиги Церковью почитаемый.

Радуйся, многия чада духовныя стяжавый;

Радуйся, тех ко спасению наставивый.

Радуйся, священномучениче Никито, молитвенниче о душах наших.

Бури житейских бед и напастей бегая, угодниче Господень, паче брака честна житие девственное возлюбил еси и потщався подражати чистому и непорочному житию преподобных отец наших, образа ангельскаго удостоился еси; и саном архимандрита почтен был еси, Богу благодарственное пение возносяще, поя «Аллилуия»!

На новое многотрудное служение в годину тяжких гонений, обышедших Церковь нашу и страну Российскую, призван был еси, священномучениче Никито, егда на четвертый день по пострижении твоем, жезл архиерейский вручи тебе богомудрый митрополит Сергий, разумеюще в сем волю Господню, мы же смиренно зовем ти:

Радуйся, послужити церкви Христовой поставленный;

Радуйся, житие монашеское восприявый.

Радуйся, именем славного святителя Новгородскаго нареченный;

Радуйся, яко того житию усердно в подвизех подражал еси.

Радуйся, обетом целомудрия чистоту сердца твоего явивый;

Радуйся, нестяжанием высоту духа твоего показавый.

Радуйся, послушанием своим Богу и ближним послуживый;

Радуйся, в сих добродетелях преуспевый.

Радуйся, во хиротонии архиерейской обильно благодать божественную восприявый;

Радуйся, апостолов и святителей достойный приемниче.

Радуйся, священномучениче Никито, молитвиниче о душах наших.

Боготечною звездою пришел еси в мире, священномучениче отче наш Никито, блистающ многотрудными подвиги твоими, добродетелию и кончиною мученическою. Тем же и сияеши на Небесех славою вечною с лики новомучеников и исповедников Орехово-Зуевских. С ними же выну воспеваеши Христу Богу Нашему: «Аллилуия».

Поюще подвиги твоя предивныя и добродетели великия, священномучениче Никито, молим тя, заступника нашего, приклони ухо твое к молениям нашим и вознеси о нас ко Господу твоя богоприятныя молитвы, прося нам от благости Его дары благопотребныя душевному спасению нашему. И да возможем мы грешнии не токмо подвиги твоя воспевати, но и добродетелем твоим подражати, зовуще:

Радуйся, светлый образе богоугождения в мире живущим;

Радуйся, воздержания и кротости учителю.

Радуйся, смирением души верных обогащающий;

Радуйся, в целомудрии нас укрепляющий.

Радуйся, из сердец наших страсти искореняющий;

Радуйся, уныния прогонителю.

Радуйся, мужу желаний духовных;

Радуйся, прошения наша исполняющий.

Радуйся, недуги телесныя и язвы духовныя исцеляющий;

Радуйся, в учении и науке помогающий.

Радуйся священномучениче Никито, молитвиниче о душах наших!

Проповедник богоносный явился еси, святе Никито, егда прииде час явитися ти во граде Бугульме, идеже бысть первый престол твой святительский, и еще не наченшу ти служение твое, егда пояша тя нечестивыя и в темницу ввергоша. Ты же благодарственно воздыхал еси Христу, давшего ти, Его ради страдати, во узах темничных воспевающе Ему: «Аллилуия».

Воссиял еси, яко звезда на тверди церковней, егда по отпущении твоем из заточения темничнаго со страхом Божиим и мудростию совершал еси служение твое, поминающе Первосвятителя Российскаго Тихона и обличая обновления лжеучение. За вся сия подвиги паки взят бысть нечестивыми и паки ввержен бысть в темницу. Сего ради, ублажающе тя, святителю Божий, вопием ти сице.

Радуйся, душепагубных расколов искоренителю;

Радуйся, пастырю добрый, заблуждших в тернии суемудрия взыскавый.

Радуйся, пламеню ереси пожигающий;

Радуйся, громе устрашающий соблазняющих.

Радуйся, истинного Православия незыблемое основание;

Радуйся, благочестия столпе непоколебимый.

Радуйся, святителя Тихона смиренный молитвенниче;

Радуйся, яко того верным последователем был еси.

Радуйся, за вся хвалу Богу возносивый;

Радуйся, с собором новомучеников и исповедников Орехово-Зуевских молитвенниче и наставниче изряднейший.

Радуйся, священномучениче Никито, молитвениче о душах наших.

Хотя человеколюбец Господь утвердити Православие в земли Московстей, направи тя во град Орехово-Зуево, идеже первый Архипастырь на престоле епископстем воссел еси, сугубым добродетельным житием, молитвами, благочестием и подвиги многими просиял еси во граде сем, яко звезда многосветлая, наставляя всех верных пети Господу нашему: «Аллилуия».

Велию радостию сердца благочестивых людей града Орехово-Зуево исполнишася, егда узреша тя, святителю, перваго архипастыря граду сему. Ты же, добре внимая пастве своей, в ней же Дух Святый постави тя епископом, пасл еси усердно Церковь Божию; кротостию, смиренномудрием и пастырскими добродетельми украсился еси. Сего ради ублажающе тя, отче наш Никито, зовем ти сице.

Радуйся, предстоятелю собора новомучеников и исповедников Орехово-Зуевских;

Радуйся, первый и предстателю наш пред Богом.

Радуйся, яко святому Михаилу, первому архиерею Церкве Русския, уподобился еси;

Радуйся, новыя кафедры святильниче преизрядный.

Радуйся, яко в годину гонений стадо свое, богомудро упасл еси;

Радуйся святаго Патриарха Тихона сослужителю.

Радуйся, яко верным слугою того был еси;

Радуйся, яко и по преставлении паству свою и град свой не оставляеши.

Радуйся, с новомученики нашими в молитве ко Господу предстателю за ны присно вопиющий;

Радуйся, яко временных и вечных благ от Бога нам просиши.

Радуйся, священномучениче Никито, молитвениче о душах наших.

«Понеже бо в премудрости Божией не разуме мир премудростию Бога, благоизволил Бог буйством проповеди спасти верующих» (1 кор 1: 21), - рече Павел богоглаголивый, ты же в сердце своем словеса сия восприял еси, и жития юродственного возжелал еси, святе Никито, Подвигоположнику же Богу воспевал еси во благодарении за милости Его: «Аллилуия»!

Весь бе Божий святителю, егда древним блаженным уподобился еси в юродивом житии твоем, и Андрею Цареградскому подражая, странником бездомным протекл еси путь жития твоего во граде Орехово – Зуево, старчества подвигом и прозорливости, ближним усердно служа, в нестяжании велием и скудости дни своя проводил еси, темже и дары благодати Господней стяжал еси, киими и насыщал еси всех верных к тебе притекающих. Сего ради, смиренно молим тя, отче наш Никито, приими похвалы сия:

Радуйся, словес апостола Павла о юродивом житии добрый последователю;

Радуйся, яко добровольным обнищанием обрел еси сокровище благ вечных;

Радуйся, имущество ничтоже на земли имевый;

Радуйся, сокровище велие обретый на небеси.

Радуйся, мира дольнего обитателю;

Радуйся, горнее блаженство унаследовый.

Радуйся, дар прозорливости смирением и молитвою стяжавый;

Радуйся, дар сей на пользу и спасение страждущих употребивый.

Радуйся, яко во юродстве велию мудрость стяжал еси;

Радуйся, старческого делания старцев Оптиной пустыни приемниче достойный.

Радуйся, священномучениче Никито, молитвениче о душах наших!

Всего себе подвигнув Богови, яко раб благий и верный послужил еси Ему, священномучениче Никито, паче иных для спасения своего потрудився: тем же и внити сподобился еси в радость Господа своего, Ему же предстоиши ныне, со ангелы поя: «Аллилуия»!

Витии многовещанныя не возмогут по достоянию воспети славу, от Господа уготованную святым Его, еяже наследником сподобился еси быти, священномучениче отче наш Никито! Сея славы сопричастницы и нас сподоби быти святыми твоими молитвами, да воспоем ти радостно:

Радуйся, во чертозех Царя Небесного со всеми святыми торжествующий;

Радуйся, с лики ангельскими хвалу Богу воспевающий.

Радуйся, с небесных высот к нам милостиво приникающий;

Радуйся, от Господа нам милость приносящий.

Радуйся, молитве нас усердно научающий;

Радуйся, со всеми новомученики и исповедники Орехово-Зуевскими прошениям нашим внемлющий.

Радуйся, яко скоро прошения наша приносящий Богу;

Радуйся, недугов душевных и телесных целителю.

Радуйся, во всякой скорби ко Христу за ны теплый молитвенниче;

Радуйся, благоуханная ветве райская.

Радуйся, священномучениче Никито, молитвенниче о душах наших!

Спастися хотяще от напастей и бед мира сего тя, всеблагий отче, теплаго предстателя и молитвенника к Богу призываем: не тщетну сотвори надежду нашу на заступление твое, не остави нас милосердием твоим; буди нам защитник необоримый от враг видимых и невидимых; избави нас ходатайством твоим от лютых бед и искушений и сподоби с тобою вечно воспевати Господу: «Аллилуия»!

Царя небесного возлюбив от всея души твоея и всего себе мыслию твоею, принесл еси Ему, священномучениче Никито, последи многоразличных приношений веры и усердных подвигов себе самого в жертву живу, святу и богоугодну. Сего ради, мы, ублажающе тя, с любовию зовем ти сице:

Радуйся, ко Господу за ны молитвенниче непрестанный;

Радуйся, в житии твоем богоугодными делы Господеви послуживый.

Радуйся, христиан непостыдное прибежище;

Радуйся, последним подвигом твоим, кончиною мученическою Того прославивый.

Радуйся, от рук раскольников нечестивых безбожным властем преданный;

Радуйся, яко клеветы многия и поношения претерпел еси.

Радуйся, нас от клеветы избавляяй;

Радуйся, пред судом неправедным представый.

Радуйся, о помиловании клеветников и судий твоих моливыйся;

Радуйся, Церкви нашей мудро и верно послуживый.

Радуйся, священномучениче Никито, молитвинниче о душах наших!

Глаголы Спасителя: «Не убойтеся убивающих тело ваше, души же не могущих убити», всем сердцем восприял еси. И на вторый день от судилища неправеднаго умучен был еси смертию. Благодаряще Господа нашего, даровавшаго тебе за Него пострадати, воспевая тому: «Аллилуйа!»

Поюще твое к Богу отшествие, священномучениче Никито, почитаем священную память твою, величаем ревность твою по Бозе, хвалим долготерпение, незлобию твоему удивляемся и страдания твоя благоговейно лобызаем,. Сего ради со смирением молим тя: приими похвальное пение наше:

Радуйся, мученическия кончины сподобивыйся;

Радуйся, душу свою Богу со смирением предавый

Радуйся, яко столпе огненный на небеса восшедый;

Радуйся, непобедимости тезоименитый

Радуйся, яко врази Божии не покориша души твоея

Радуйся, страстотерпче долготерпеливый и незлобивый.

Радуйся, древних мучеников достойный сонаследниче;

Радуйся, к сонму новомучеников сопричтенный;

Радуйся, яко с новомученики и исповедники Орехово-Зуевскими молиши Господа нашего страну нашу и вся христианския страны помиловати;

Радуйся, и о нашем спасении ко Святей Троице ходайствующий.

Радуйся, священномучениче Никито, молитвенниче о душах наших!

Странное и преславное чудо благодати небесныя является ныне во очию всех верных: долготерпеливый и многомилостивый Господь не прогневася на ны до конца за великия беззакония наша, но, помянув щедроты Своя даровал нам тебе, пречудне отче наш Никито, заступника и ходатая изряднаго, да выну поем Господеви: «Аллилуия»!

Воспеваем благодать Господа нашего Иисуса Христа, даровавшаго нам тебе, святителю Никито, заступника великаго, ходатая изряднаго, молитвенника теплаго, во всяком деле скораго помощника. Восхваляем тя, пречудне и предивне отче наш Никито, яко к тебе по Бозе мы прибегаем и глаголем сице:

Радуйся, в лето двухтысящное от Рождества Христова с собором новомучеников Орехово-Зуевских прославленный;

Радуйся, со всеми Новомученики и исповедники Российскими хвалу Богу возносяй.

Радуйся, в учении сущим помогаяй;

Радуйся, старых в немощи укрепляй.

Радуйся, недуги наша исцеляяй;

Радуйся, святителю и пастырю града Орехово- Зуево.

Радуйся, ко Иерусалиму небесному звездо путеводная;

Радуйся, в житии временнем и вечнем вспоможение.

Радуйся, юных от греха блуда отвращай;

Радуйся, тех во целомудрии утверждаяй.

Радуйся, священномучениче Никито, молитвенниче о душах наших!

О, священномучениче отче Никито,

заступниче наш теплый, и молитвенниче непрестанный. Приими от нас милостиво малое сие моление и сохрани нас от врагов видимых и невидимых, от всякия скорби, напрасныя смерти и будущия муки; да сподобимся с тобою и всеми новомученики и исповедники Орехово-Зуевскими воспевати Господу и Спасителю нашему: «Аллилуия!»

Сей кондак – трижды, затем снова Икос 1 и Кондак 1.

Читайте также:

Житие священномученика Никиты

Молитва священномученику Никите